COVID-19: Tiv Thaiv Koj Tus Kheej & Lwm Tus

Kho tshiab 3/15/2024

Cov tswv yim tiv thaiv tseem ceeb
Tswv yim tiv thaiv ntxiv
Cov sijhawm tseem ceeb rau kev tiv thaiv
    Muaj mob, tab tom zoo mob, lossis tau mus nyob ze chwv raug COVID-19
    Muaj feem siab dua yuav mob hnyav
    Muaj kab mob nce siab hauv zej zog
Cov chaw tshwj xeeb

Tus kab uas ua rau mob COVID-19 tseem sib kis thiab mob rau cov neeg hauv Minnesota thiab thoob plaws lub ntiaj teb. Cov Koom Haum Tswj Xyuas thiab Tiv Thaiv Kab Mob (CDC) pom zoo rau ua ob peb yam kauj ruam tseem ceeb los mus txo kev sib kis kab mob ntawm kev ua pa, uas yog mob tau rau koj lub qhov ntswg, lub qa, thiab ob lub ntsws, xws li kab mob COVID-19, mob khaub thuas (flu), thiab mob respiratory syncytial virus (RSV), (CDC: Tiv Thaiv Cov Kab Mob Kev Ua Pa). Minnesota Lub Tuam Tsev Saib Xyuas Kev Noj Qab Haus Huv (MDH) kuj pom zoo rau cov kauj ruam no thiab.

Daim nplooj ntawv no qhia txog thawj cov hauv kev koj ua tau los mus txo kev sib kis mob COVID-19 thiab lwm yam kab mob ntawm kev ua pa.

Kev ua raws coj kauj ruam no, hu hais tias tswv yim tiv thaiv, pab rau yus tus kheej, cov neeg yus hlub, thiab yus lub zej zog kom nyob noj qab nyob zoo.

Cov tswv yim tiv thaiv tseem ceeb

Cov kauj ruam tseem ceeb koj ua tau los mus tiv thaiv koj tus kheej thiab lwm tus neeg ntawm cov kab mob xws li COVID-19, mob khaub thuas (flu) thiab mob RSV:

• Kev txhaj tshuaj yog qhov kev tiv thaiv zoo tshaj plaws kom txhob mob hnyav los ntawm kab mob COVID-19.
• Kev saib xyuas tu kom huv yog suav nrog rau cov kauj ruam xws li ntxuav tes thiab npog qhov ncauj thaum koj hnoos.
• Cov huab cua huv: Tej yam xws li qhib qhov rai lossis yog muaj kev sib sau ces ua rau nraum zoov yuav pab txo tau kab mob kom qis nyob hauv cov huab cua.

Yog koj muaj mob los yog xav tias koj mob lawm:

• Nyob tsev thaum koj muaj mob thiab siv kev xyuam xim los mus tiv thaiv kev sib kis kab mob.
• Kev kho mob: Tham nrog koj tus kws kho mob, txais tshuaj siv thaum ntxov.

Muaj mob, tab tom zoo mob, lossis tau mus nyob ze chwv raug COVID-19.

Tswv yim tiv thaiv ntxiv

Siv cov kauj ruam tiv thaiv kab mob ntawv kev ua pa no ntxiv rau cov tswv yim tiv thaiv saum toj:

• Looj ntaub npog qhov ncauj qhov ntswg
• Nyob kom nrug deb lwm tus
• Mus kuaj cov kab mob sib kis ntawm kev ua pa

Mus saib ntxiv txog tias yuav ntxiv cov kauj ruam tiv thaiv kab mob no li cas rau koj lub neej, CDC: Kev Tiv Thaiv.

Cov sijhawm tseem ceeb rau kev tiv thaiv

Cov tswv yim tiv thaiv tag nrho tuaj yeem txo tau kev muaj mob thiab kev kis kab mob. Kev ntxiv (tshooj) cov tswv yim tiv thaiv pab tau ntau heev thaum:

Muaj mob, tab tom zoo mob, lossis tau mus nyob ze chwv raug COVID-19

Yog xav paub cov lus taw qhia thiab cov sijhawm kom ntxaws txog tias yuav nyob tsev ho ntev raws li kev muaj tsos mob, ces mus saib CDC: Tiv Thaiv Kev Sib Kis Cov Kab Mob Kev Ua Pa Thaum Koj Muaj Mob.

Muaj feem siab dua yuav mob hnyav

Yog koj, lossis cov neeg ib puag ncig koj muaj Feem Siab Mob Tau Hnyav Heev los ntawm Cov Kab Mob Kev Ua Pa (CDC: Risk Factors for Severe Illness from Respiratory Viruses), ces kev xyuam xim ob peb yam, koom nrog rau kev siv tswv yiv tiv thaiv (looj ntaub npog qhov ncauj qhov ntswg, nyob kom nrug deb lwm tus, thiab kuaj mob), pab tiv thaiv kab mob tau.

Cov pawg neeg uas muaj feem siab dua yuav mob tau hnyav los ntawm cov kab mob kev ua pa:

• Cov neeg laus muaj hnub nyoog
• Menyuam me
• Cov neeg lub cev tsis muaj zog tiv thaiv kab mob (piv xam li: ib tug neeg uas tab tom siv tshuaj kho mob cancer)
• Cov neeg xiam oos khab
• Cov neeg lub cev tab tom xeeb menyuam

Cov kauj ruam koj ua tau:

• Ntxiv cov tswv yim tiv thaiv tseem ceeb thiab lwm yam tswv yim txhawb ntxiv rau kev tiv thaiv.
• Nug koj tus kws kho mob:
  • Tej zaum koj txais tau txiaj ntsig los ntawm kev txhaj koob tshuaj tshiab tiv thaiv COVID-19 ntxiv, thiab lwm yam tshuaj tiv thaiv uas pom zoo rau koj.
  • Nug seb tshuaj cheem kab mob (antiviral medications) puas tsim nyog muab rau koj siv.
• Yog koj lub cev tsis muaj zog tiv thaiv kab mob, tej zaum koj muaj cai txais tau qhov kev kho mob monocloncal antibody treatment pab tiv thaiv COVID-19 ntxiv rau kev txhaj tshuaj tiv thaiv COVID-19 thiab.
  • Mus saib COVID-19 Medications Tshuaj kho mob COVID-19 kom paub ntxiv.

Muaj kab mob nce siab hauv zej zog

Cov kab mob ntawm kev ua pa yog sib kis ntawm ib tug neeg mus rau ib tug neeg. Thaum muaj neeg mob coob tuaj nyob hauv koj lub zej zog, koj kuj muaj feem nce siab yuav mob tau thiab. Koom haum CDC thiab MDH puav leej muaj cov cuab yeej pab rau koj paub txog theem mob nkeeg ntawm cov kab mob kev ua pa uas sib kis nyob rau koj lub zej zog, Siv cov ntaub ntawv no, nrog rau kev muaj feem kis mob uas koj, koj tsev neeg, lossis cov neeg ib puag ncig koj muaj, los mus txiav txim seb thaum twg thiaj tsim nyog siv cov tswv yim tiv thaiv txhawb ntxiv.

• Mus nyeem cov Xov Xwm Tshiab Tshaj Plaws Txog COVID-19 hauv Minnesota, Situation Update for COVID-19.
• Siv CDC qhov cuab yeej "Muaj dab tsi tshwm sim ze koj" Protect yourself and others from Flu, COVID-19, and RSV txog kev Tiv Thaiv koj tus kheej thiab lwm tus ntawm khaub thuas (flu), COVID-19, thiab mob RSV kom paub txog cov theem mob nkeeg ntawm kab mob ua pa hauv koj cheeb tsam thiab cov kev koj ua tau los mus tiv thaiv koj thiab lwm tus.
• CDC: Tshooj Ntaub Ntawv Qhia Txog Kab Mob Kev Ua Pa Nyob Rau Ib Lim Tiam
• Kab Mob Kev Ua Pa hauv Minnesota

Cov chaw tshwj xeeb

Thaum tib neeg coob coob los sib sau nyob ua ke los yog nquag siv sijhawm nyob sib ze ua ke ntau heev, ces muaj hauv kev nce siab rau qhov yuav sib kis kab mob ua pa. Tej chaw xws li cov tsev saib xyuas neeg mob thiab tu cov neeg muaj mob ntev tej zaum yuav muaj cov cai taw qhia uas txawv ntawm cov cai rau pej xeem dav dav. Cov cai taw qhia tej zaum yuav txawv vim tias cov pawg neeg no muaj cov uas muaj feem siab yuav mob tau hnyav heev. Cov kab lus (links) hauv qab no muaj ntaub ntawv taw qhia cov koom haus rau lawv cov kev txiav txim:

• Lus taw qhia los ntawm CDC rau cov neeg ua hauj lwm saib xyuas kev mob nkeeg: Lus Taw Qhia Kev Saib Xyuas rau Cov Neeg Ua Hauj Lwm Saib Xyuas Kev Mob Nkeeg uas Muaj Kab Mob SARS-CoV-2 lossis tau chwv raug Kab Mob SARS-CoV-2.
• Lus taw qhia rau cov chaw saib xyuas mob nkeeg, CDC: Infection Control Guidance: SARS-CoV-2.
• Cov chaw rau coob pawg neeg nyob thiab txais kev saib xyuas, xws li lub chaw rau cov neeg tsis muaj tsev nyob lossis cov nkuaj neeg raug txim, qhia mus tau rau Nkuaj Neeg Raug Txim, Cov Chaw Kaw Neeg Tsis Tau Txiav Txim, & Cov Chaw Pab Rau Cov Neeg Tsis Muaj Tsev Nyob: COVID-19 rau cov peev txheej ntxiv.
• Tej chaw lag luam, tej tsev ua hauj lwm, lossis lwm cov chaw, yam tsawg tsim nyog ua raws MDH thiab CDC cov lus taw qhia. Yog lawv xav tswj cov cai kom tib neeg cais tus kheej nyob tsev kom ntev zog lossis looj ntaub npog qhov ncauj qhov ntswg kom ntev zog tom qab tau mus nyob ze chwv raug lwm tus neeg mob COVID-19 los kuj ua tau.